Søndagskveld i stova

Det er søndagskveld, og roa har senka seg over stova. Jentene søv, musikanten er på besøk hos kjæresten, og vi gamle foreldra slappar av. Ganske behageleg. Eg har sett gjennom bileta frå forrige veke, då vi hadde venskapsveke på skulen. Den har eg alt fortalt om, så det skal eg ikkje gjere no. Men eg tenkte eg kunne vise fram kor fin utsikt eg hadde, der eg sat og passa bålet før elevane kom og grilla. Dette er utsikta frå ytterkanten av skulen sitt område, og det er ganske vakkert:) Litt godt var det også å site der og fyre opp bål, trass i røyk og litt regn... Det er noko skikkeleg over det å lage eit godt bål, ikkje sant?

I går besøkte vi Barnas lekeland i Spjelkavik, der kosa jentene seg eit par timar. Dei kunne gjerne ha vore der lenger, men etterpå fann vi ei av supertantene som bur på den andre sida av fjorden:) Ho og sambo har ein diiiiger hund. Odin er ein riesenschauser, eller risengrynshund... Han er lett å klappe, du treng ikkje å bøye deg ned, for å seie det slik.


Innimellom alt det andre som skjer i livet for tida, vert det også strikka nokre masker av og til. Desse sokkane trengde storesøster, så då passa det godt å bruke opp litt av det kjedelege raggsokkgarnet som låg i kassa:) Hausten er på full fart, det er berre å vere klar med varme klede!