Laurdagskveld på Ishavet

I kveld har eg vore med på noko spesielt. Vox Virorum hadde konsert saman med Strings Unlimited på dekk av ei ishavsskute! No ligg heldigvis ikkje skuta på ishavet, men i eit vernebygg ved Ishavsmuseet Aarvak, oppkalla etter skuta.
Vi fekk relativt god plass, det var plass til mykje meir folk der. Men eg trur at det inderleg dårlege veret gjorde at folk ikkje hadde lyst til å ta laust. Det er vanskeleg å få opp temperaturen i bygget, og det veit folk. Men arrangørane hadde jo venta at det skulle vere litt meir enn 4 grader ute i kveld... Det har sludda, regna, blese og stort sett vore kjedeleg ver.

Det er jo litt kult å arrangere konsert på skutedekk. Rett nok var det plass til publikum på sidene av båten også, men eg sat godt plassert framfor styrehuset.

Det var ikkje berre enkelt å arrangere konsert no, i desse vulkanske tider. Island og askeskyer var nemnt nokre gongar i løpet av kvelden... Strings-damene måtte ta bil frå Oslo istaden for fly, og ein av songarane sat askefast i Italia for nokre dagar sidan. Det var ein krevande operasjon å kome seg heim i tide til konserten! Dei fekk låne bil av far til ei av Strings-damene, så dei kom seg frå Oslo og heim. Faktisk kom songaren til øya 5 minutt før konserten starta!